Serie de televisión de suspense producida por Voz Audiovisual para a Televisión de Galicia. Emitiuse por vez primeira o domingo á noite 5 de outubro de 2014 na TVG en horario de máxima audiencia.

En Serramoura, unha pequena aldea ficticia que vive da explotación madeireira, Mónica Triáns (Sara Casasnovas), unha moza camareira do único hostal da vila, aparece morta no medio do monte con claros signos de se tratar dun asasinato cruento. Perante o homicidio, é enviado á vila Diego Bazán (Mighello Blanco), que xunto coa sarxento local Marga Neira (Lucía Regueiro), tentarán dar coa solución do caso. Porén, a idiosincrasia do pobo, o conflito de intereses entre as dúas principais familias, os Soutelo e os Fiúza, que pelexarán polo control do serradoiro, e os segredos que todos os habitantes do pobo gardan, farán da resolución do caso unha tarefa complicada.