Un documental dirixido por Jorge Algora que revisita os últimos cincuenta anos da educación en Galicia

Esta peza audiovisual é unha viaxe pola experiencia profesional e persoal de José Alberto Sacido Tuñas, mestre en activo dende o seu primeiro destino provisional en Camboño (Lousame-A Coruña) en 1961 ata a súa xubilación en 1996 no Colexio de Educación Infantil e Primaria de Igrexa–Calo (Teo-A Coruña). Pero fundamentalmente é un percorrido polos espazos vitais das persoas que o acompañaron na súa peregrinaxe de escola en escola, das parroquias e aldeas aos centros comarcais que xorden coa EXB, implantada pola Lei xeral de educación de 1970.