Comedia de situación galega que narra as aventuras que teñen lugar nun piso de estudantes e que se emitiu na TVG no ano 2005. Foi dirixida por Beatriz del Monte e producida por Filmanova e La Región TV.

A historia comeza cando tres mozos universitarios, Sebas, Lucía e Fran, deciden independizarse dos pais compartindo un piso na cidade como tantos estudantes galegos; doutra parte están os veciños de enfronte, un matrimonio cuarentón, Diego e Ana, que representan a vida en parella e que tamén buscan na cidade unha nova oportunidade; doutro lado están as constantes visitas dos pais de Sebas que se converten nun terremoto nas vidas dos estudantes. Por último, Raúl representa a madurez, pero tratada desde o punto de vista dos emigrantes que retornan a Galicia dende os seus países de adopción.