Serie de humor da TVG producido por Zopilote S.L e CTV, e creado por Carlos Ares, Xosé Castro e Andrés Mahía e que comezou a emitirse no 2007.

Espazo que pretende, en palabras dos seus creadores, "rirse dunha maneira de ser, a nosa". Unha serie de sketch curtos intentan reflectir de maneira irónica a relación que os galegos mantemos con diferentes temas, desde os deportes ata o Camiño de Santiago, desde as vacacións á política e así con distintas actitudes fronte á vida. Air Galicia é un programa de humor en que ten cabida a crítica social, a parodia televisiva e o humor político, sen renunciar a certas doses de surrealismo absurdo e transgresión. Aínda que de temática diferente, todos os programas incluirán aparicións de personaxes recorrentes: un avogado con poucos escrúpulos, uns rapaces de barrio periférico, un camioneiro, o persoal dunha clínica sanitaria, unha parella particular de construtores e a aparición estelar de catro tiranos mortos: Hitler, Mussolini, Stalin e Pol Pot, que participarán en parodias de programas históricos da televisión mundial.